مسلمان، آزاد، عاقل، بالغ، صاحبِ نصاب پر اپنے مال کی زکات فرض ہوتی ہے، کہ جب وہ مال مالِ نامی ہو اور حاجت اصلیہ سے زائد ہو اور وہ مال مالک کے قبضہ و قدرت میں ہو اور قرض سے فارغ ہو اور اس مال پر ایک سال گزرا ہو۔

زکاۃ کی تعریف

زکات ﷲ پاک کے لیے مال میں سے ایک مقرر کردہ حصے کو کہتے ہیں جو کسی مسلمان فقیر کو دی جاتی ہے اور وہ فقیر ہاشمی نہ ہو اور اپنا نفع اس مال سے بالکل جدا کر لے۔

زکات فرض ہونے کی شرائط

زکات ہر کسی پر فرض نہیں ہوتی بلکہ زکات واجب ہونے کے لئے چند شرائط ہیں تو جس شخص میں وہ شرائط پائی جائیں فقط اس پر زکات لازم ہو گی۔

• مسلمان ہونا۔
• آزاد ہونا
• عاقل اور بالغ ہونا
• بقدر نصاب مال کا مالک ہونا ⁽¹⁾
  مال حقیقی یا حکمی قبضے میں ہو اور اس پر قدرت رکھتا ہو۔
• اس کے پاس موجود نصاب قرض سے فارغ ہو۔ ⁽²⁾
• نصاب حاجت اصلیہ سے فارغ ہو۔ ⁽³⁾
• مال نامی ہو۔ ⁽⁴⁾
• اس مال نصاب پر پورا ایک سال گزرا ہو۔ ^{(5) (6)}

جس شخص میں یہ شرائط پائی جائیں تو اس پر زکات فرض ہو گی اور پھر مال کے چالیسویں حصے کا کسی زکات کے مستحق بندے کو مالک بنایا دیا جائے گا یا کسی بندے یا ادارے کو وکیل کیا جائے گا کہ وہ کسی مستحق زکات کو مالک بنا دے۔