درود شریف کی فضیلت قرآن و احادیث کی روشی میں

اللہ پاک قرآن پاک میں ارشاد فرماتا ہے،

ترجمہ: بے شک اللہ اور اس کے فرشتے دورد بھیجتے ہیں اس نبی پر اے ایمان والوان پر درود اور خوب سلام بھیجو ۔“⁽¹⁾پ ۲۲ سورۃ الاحزاب آیت ۵۶
زندگی بھر میں ایک مرتبہ درود شریف پڑھنا فرض ہے، اور کسی محفل میں پہلی مرتبہ ذکر ہونے پر پڑھنا واجب اور باربار ذکر ہونے پر درود پاک پڑھنا مستحب ہے ۔

درود شریف کے فضائل احادیث کی روشی میں

سرکارِ مدینہ ،فیض گنجینہ ،راحتِ قلب وسینہ ﷺ پر درود پاک پڑھنے کے بے شمار فضائل احادیث ِ مبارکہ میں وارد ہوئے ہیں ،چند روایات پیش ِ خدمت ہیں ،

1.  فرمانِ مصطفی ﷺ ہے:”اللہ عزوجل کی خاطر آپس میں محبت رکھنے والے جب باہم ملیں اورمصافحہ کریں اورنبی⁽²⁾ اپر درود پاک بھیجیں تو ان کے جدا ہونے سے پہلے دونوں کے اگلے پچھلے گناہ بخش دئیے جاتے ہیں۔”⁽³⁾مسند ابی یعلی ، رقم الحدیث ۲۹۰۱،ج۳ ،ص۹۵
2.  فرمانِ مصطفی ﷺ ہے:”جس نے محمد پردرود پاک پڑھا اورکہا
   
   ، ”اللّٰھُمَّ اَنْزِلْہُ الْمَقْعَدَ الْمُقَرَّبَ عِنْدَ کَ یَوْمَ الْقِیَامَۃِ “
   
   اس کے لیے میری شفاعت واجِب ہوگئی۔“⁽⁴⁾المعجم الاوسط ،رقم الحدیث ۳۲۸۵،ج۲ ،ص ۲۷۹
3.  فرمانِ مصطفی ﷺ ہے:”مجھ پر کثرت سے درود پاک پڑھو بے شک تمہارا مجھ پر درود پاک پڑھنا تمہارے گناہوں کیلئے مغفرت ہے ۔“⁽⁵⁾الجامع الصغیر،رقم الحدیث ۱۴۰۶،ج۲،ص۱۱۲
4.  فرمانِ مصطفی ﷺ ہے:”بے شک اللہ تعالی نے ایک فِرشتہ میری قبر پر مقرر فرمایا ہے جسے تمام مخلوق کی آوازیں سننے کی طاقت عطا فرمائی ہے پس قیامت تک جو کوئی مجھ پر درود پاک پڑھتا ہے تو وہ مجھے اس کا اوراسکے باپ کا نام پیش کرتاہے ۔کہتاہے ،فُلاں بن فُلاں نے آپ پر اس وقت درود پاک پڑھا ہے۔“⁽⁶⁾مجمع الزوائد،کتاب الادعیۃ، رقم الحدیث ۱۷۲۹۱،ج۱۰ ،ص۲۵۱
5.  فرمانِ مصطفی ﷺ ہے:
   ”جو مجھ پر سو مرتبہ درود پاک پڑھے گا اللہ عزوجل اس کی سو حاجات پوری فرمائے گا ،ان میں سے تیس دنیا کی ہیں اور ستّرآخرت کی۔“⁽⁷⁾کنز العُمّال ،کتاب الاذکار،رقم الحدیث ۲۲۲۹،ج۱ ،ص ۲۵۵
6.  فرمانِ مصطفی ﷺ ہے:”جس نے یہ کہا
   جَزَ ی اللہُ عَنَّا مَحَمدًا مَّا ھُوَ اَھْلُہٗ
   
   توستّر فِرِشتے ایک ہزار دن تک اس کیلئے نیکیاں لکھتے رہیں گے ۔“⁽⁸⁾المعجم الکبیر ، رقم الحدیث۱۱۵۰۹،ج۱۱، ص۱۶۵
7.  فرمانِ مصطفی ﷺ ہے: ” بروزِ قیامت لوگوں میں سے میرے قریب تر وہ ہوگا جس نے دنیامیں مجھ پر زیادہ درودِ پاک پڑھے ہوں گے ۔“⁽⁹⁾ ترمذی،کتاب الوتر، ج ۲، ص۲۷
8.  فرمانِ مصطفی ﷺ ہے:”مجھ پر درود شریف پڑھو اللہ تعالیٰ تم پر رحمت بھیجے گا۔“⁽¹⁰⁾تفسیر درمنثور ،ج۶ ،ص۶۵۴
9.  فرمانِ مصطفی ﷺ ہے:”اے لوگو! بے شک بروز قِیامت اسکی دَہشتوں اورحساب کتاب سے جلد نجات پانے والا شخص وہ ہوگا جس نے تم میں سے مجھ پر دنیا کے اندر بکثرت درود شریف پڑھے ہوں گے۔“⁽¹¹⁾فردوس الاخبار ، رقم الحدیث ۸۲۱۰ ،ج۲ ،ص ۴۷۱
10.  فرمانِ مصطفی ﷺ ہے:”جس نے مجھ پر سو مرتبہ درود پاک پڑھا اللہ تعالیٰ اُس کی دونوں آنکھوں کے درمیان لکھ دیتاہے کہ یہ نِفاق اورجہنم کی آگ سے آزاد ہے اوراُسے بروزِ قیامت شُہَدا ء کے ساتھ رکھے گا ۔“⁽¹²⁾مجمع الزوائد،رقم الحدیث ۱۷۲۹۸، ج۱۰،ص۲۵۳
11.  فرمانِ مصطفی ﷺ ہے:”جو مجھ پر ایک دن میں ایک ہزار باردرود ِ پاک پڑھے گاوہ اُس وقت تک نہیں مرے گا جب تک جنت میں اپنا مقام نہ دیکھ لے ۔“⁽¹³⁾الترغیب والترہیب ،کتاب الذکر والدعاء ج۲ ،ص ۳۲۸
12.  فرمانِ مصطفی ﷺ ہے:”جس نے دن اوررات میں میری طرف شوق ومحبت کی وجہ سے تین تین مرتبہ درودِ پاک پڑھا اللہ تعالیٰ پر حق ہے کہ وہ اُس کے اُس دن اوراُس رات کے گناہ بخش دے ۔“⁽¹⁴⁾الترغیب والترہیب،کتاب الذکر، ج۲،ص ۳۲۸

اللہ تعالیٰ ہمیں اپنی زبان درود شریف پڑھنے میں استعمال کرنے کی توفیق عطا فرمائے ۔ آمین بجاہ النبی الامین ﷺ