حضرت امام مہدی رضی اللہ عنہ کا ظهور
حضرت امام مہدی رضی اللہ عنہ خلیفۃ اللہ ہیں۔ آپ رضی اللہ عنہ حضور نبی کریم ﷺ کی آل (1) میں سے حسنی سیّد ہوں گے۔ جب دنیا میں کُفر پھیل جائے گا اور اسلام حرمین شریفین (2) کی طرف سمٹ جائے گا، اولیاء و ابدال (3) وہاں کو ہجرت کر جائیں گے۔
ماہ رمضان میں ابدال کعبہ شریف کے طواف میں مشغول ہوں گے، وہاں اولیاء حضرت امام مہدی (Imam Mahdi) رضی اللہ عنہ کو پہچان کر ان سےبیعت کی درخواست کریں گے۔ آپ رضی اللہ عنہ انکار فرمائیں گے۔ غیب سے آواز آئے گی:
ھٰذَا خَلِیْفَۃُ اللہِ الْمَھْدِیْ فَاسْمَعُوْا لَہٗ وَ اَطِیْعُوْہٗ
یہ اللہ پاک کے خلیفہ مہدی ہیں ان کا حکم سنو اور اطاعت کرو۔ لوگ آپ رضی اللہ عنہ کے دستِ مبارک پر بیعت کریں گے وہاں سے مسلمانوں کو ساتھ لے کر شام تشریف لے جائيں گے۔ آپ کا زمانہ بڑی خیر و برکت کا ہو گا۔ زمین عدل و انصاف سے بھر جائے گی۔
